اماں کے نام

5 جولائی 2009 کو والدہ محترمہ کی وفات کے بعد میں نے متعدد بار کالم لکھنے کی کوشش کی، لیکن ہر بار آنسو لفظوںکو کاغذ سے مٹا دیتے۔ اب دوبارہ ہمت باندھی ہے تو سمجھ میں نہیں آتا کہ بات کہاں سے شروع کروں۔

میری والدہ صاحبہ 80 سال کی عمر میں بھر پور زندگی گزارنے کے بعد سیکڑوں آنکھیں اشکبار چھوڑ کر ہمیشہ کے لئے چلی گئیں، لیکن اُن کی آواز ہمیشہ میرے کانوں میں گونجتی رہے گی۔ شاہد ڈھائی یا تین سال کی عمر میں پہلی بار مجھے احساس ہوا کہ ماں میرے وجود کا حصہ ہے۔ کسی رشتہ دار کی شادی میں وہ مجھے اور میرے چھوٹے بھائی کو کمرے میں سُلا کر دوسری خواتین کے ساتھ آنگن میں شادی کی رسم میں مصروف تھیں۔ میری آنکھ کھلی تو انہیں نہ پا کر پریشان ہو گیا۔ انہیں تلاش کرنے کے لئے کمرے سے باہر نکل کر آنگن کی طرف بڑھا تو وہاں بہت سی خواتین لال رنگ کی چادر کونوں سے ٹانگ اُس کے نیچے اور آس پاس کھڑی بلند آواز میں شادی کے گیت گا رہی تھیں، لیکن مجھے اماں نظر نہ آئیں۔ ایک لمحے کو جب مجھے لگا کہ وہ ہجوم میں کھو گئی ہیں تو میرے وجود سے جان نکل گئی، لیکن اگلے ہی لحے پرسکون ہو گیا کیونکہ اس ہجوم میں اماں کی آواز بالکل الگ اور واضح تھی جس نے مجھے اپنی طرف کھینچ لیا۔ میری زندگی کی پہلی یاد سے سفر آخرت کے لئے آنکھ بند ہونے تک اُن کی آواز سب سے منفرد رہی۔

والدہ صاحبہ قمر جہاں بھارتی ریاست بہار کے شہر گیا میں پیدا ہوئیں۔ اسی شہر میں بدھا کو گیان آیا تھا۔ شاہد ہماری اماں کی پیدائش سے پہلے بہار میں گیان نہیں آیا ہو گا، لیکن مان لیتے ہیں کیونکہ بدھ مت اور ہندو مت کے بارے میں سب سے پہلے ہماری ماں نے ہی ہمیں بتایا۔ ہم نے اپنی اماں جیسا مسلمان کم ہی دیکھا۔ اُن کے ایمان کا ولولہ ہم جیسے گنہگار انسانوں کو بھی اللہ رسول کے ذکر کی طرف راغب کر دیتا ہے، لیکن اس کے باوجود انہوں نے اپنے دو صاحبزادوں کو غیر مسلم خواتین سے شادی کرنے کی اجازت دی۔ ہم چار بھائیوں کو اپنے آنچل کے سائے تلے اخلاق کے دائرے میں رہتے ہوئے شوق پورے کرنے کا موقع دیا۔ اماں کا فلسفہ تھا کہ بچوں کو گھر پر اُن کے شوق پورے کرنے دیئے جائیں تا کہ دوسروں کو دیکھ کر انہیں کوئی حسرت اور پریشانی نہ ہو۔ اس فلسفے کا ہمیں بہت فائدہ بھی حاصل ہوا۔

دیکھا جائے تو وہ فرد واحد کی صورت میں ایسی این جی او تھیں جن کا مشن دوسروں کا دُکھ درد بانٹنا تھا۔ دوسروں کی پریشانی دور کرنے کی خاطر وہ پہلے اپنے گھر ہی سے زیادہ رقم جمع کرتیں۔ اُن کا دل دوسروں کے درد کی شدت سے لبریز تھا تو زندگی تسکین کی مظہر۔

اگرچہ انہوں نے باقاعدہ تعلیم تو حاصل نہیں کی تھی، لیکن اردو ادب اور مذہبی علوم پر عبور حاصل تھا۔ آج کل کے حالات سے بے خبر نہیں تھیں اور سیاسی بصیرت بھی خوب تھی۔ 11 ستمبر 2001 کو امریکا پر فضائی حملوں کے بعد جب میں اُن سے ملا تو گھر میں اسامہ بن لادن کا ذکر ہونے لگا۔ فرمانے لگیں‘‘کم بخت مارا اسلام کا دشمن ہے’’۔

ہمارے کئی رشتہ دار سعودی عرب سے واپسی پر وہابی رنگ لایا کرتے تھے۔ وہ رنگ تصویر کو دشمن اور پنج سورہ کو غیر اسلامی سمجھتے تھے۔ والدہ صاحبہ کو اُن سے بہت کوفت ہوتی کیونکہ اُن کے عقیدے میں پنج سورہ پڑھنا ثواب تھا اور خوشی کے موقع پر میلاد پڑھی جاتی تھی، لیکن اُن کے رہتے دنیا بدلتی جا رہی تھی۔

میری دعا ہے کہ اللہ تعالیٰ انہیں جنت الفردوس میں اپنے والدین،بھائی بہنوں میرے اور والد کے ساتھ اعلیٰ مقام عطاء فرمائے۔ (آمین)